Младост во сабота во салата „Млаз“ во Богданци ќе ја бара првата сезонска победа во шестото коло на Суперлигата против Еурофарм Пелистер 2 од Битола.
По три пропуштени шанси за победа против Бутел во првото коло против Прилеп на домашен терен и против Мулти Есенс во гости, сега против „двојката“ од Битола е можност за прва сезонска радост.
Пред натпреварот со Еурофарм Пелистер, разговаравме со голманот на Младост, Живојин Илиќ, кој за Спортска Мрежа најпрво зборуваше за мечот со Мулти Есенс од претходното коло и пропуштената можност за победа во Автокоманда.
„Беше тоа тежок натпревар, против директен конкурент во борбата за опстанок. Ни недостигаше малку среќа и трпение во нападот. Одбраната, од друга страна, беше одлична. Она што ме радува е што не паднавме по овие претходни натпревари и што го оставивме и последниот атом сила на теренот.“
Голманот на тимот од Богданци в сабота против битолчани очекува машки натпревар, но дополнува дека очекува и тежок натпревар.
„Против Пелистер 2 очекувам машки натпревар, во кој ќе има многу цврсти одбрани од двете страни. Екипата на Пелистер 2 е малку поискусна од Мулти Есенс. Така што очекувам тежок натпревар. Но, играме дома и сите сме фокусирани конечно да стигнеме до првата победа.“
Илиќ е миленик на публиката и ги собира аплаузите на секоја неговата интервенција на секој меч, дополни дека поддршката значи многу и дека дефинитивно е осми играч на тимот.
„Публиката во Богданци е навистина феноменална. Нејзината поддршка многу ни значи. Дефинитивно е нашиот осми играч. А тоа што сум миленик на публиката ми годи. Но, мислам дека нашата публика кон сите гледа исто. Само се менуваме едни со други. И тоа сигурно нè турка уште повеќе напред, да играме што подобро и да растеме како екипа од натпревар во натпревар.“
Натпреварот меѓу Младост и Еурофарм Пелистер 2 се игра во сабота од 17 часот во салата „Млаз“, која се очекува да биде исполнета до последното место.
