Македонскиот прволигаш Струга Трим Лум продолжува активно да го гради ростерот за претстојната сезона, носејќи три различни профили на фудбалери со цел да ја зголеми конкуренцијата и стабилноста во тимот.
Најново засилување во клубот е младиот голман Андреј Јовчевски, кој пристигнува од редовите на Пелистер. 22-годишниот чувар на мрежата се очекува да биде дополнителна опција меѓу стативите и да донесе свежина во голманската линија на стружани.
Покрај него, одбраната на Струга ТЛ ќе биде засилена со искусниот стопер Егзон Белица, кој пристигнува од Работнички. Поранешен капитен на „романтичарите“, Белица носи значително прволигашко и меѓународно искуство, настапувајќи во повеќе земји низ Европа и важи за играч што може да внесе стабилност и сигурност во последната линија.
Третото ново име во нападот е францускиот офанзивец Хамонд Агамах, кој доаѓа по настапи во пониските француски лиги. 29-годишниот напаѓач ќе претставува нова опција во офанзивниот дел од тимот и се очекува да донесе поголема длабочина и разновидност во завршницата.
Со овие три засилувања, Струга ТЛ јасно ја покажува амбицијата да биде конкурентна во врвот на македонскиот фудбал и во новата сезона да атакува на високи цели во Првата лига.
