Тетовска Шкендија официјално потврди дека Јетон Беќири повеќе нема да биде шеф на стручниот штаб на „црвено-црните“, откако двете страни решија да ја завршат соработката по крајот на сезоната 2025/2026.
Од клубот соопштија дека договорот на Беќири истекол со завршувањето на натпреварувачката сезона, а по заедничка анализа и проценка било одлучено во овој момент патиштата да се разделат, со што се затвора едно значајно поглавје во поновата историја на Шкендија.
Беќири го презеде тимот во јануари 2024 година и во периодот минат на клупата на тетовскиот клуб успеа да остави сериозен белег. Под негово водство, Шкендија ја освои шампионската титула во сезоната 2024/2025, а клубот ја имаше и најуспешната европска кампања во својата историја.
Тетовци стигнаа до лигашката фаза од Конференциската лига на УЕФА, а потоа обезбедија и пласман во плејоф рундата од натпреварувањето. Во текот на европската сезона, Шкендија одигра дури 16 натпревари на меѓународна сцена, што претставува рекорд за македонски клуб.
Сепак, и покрај историскиот успех во Европа, Шкендија сезоната на домашната сцена ја заврши без трофеј. Тетовскиот состав заврши како вицешампион во Првата македонска фудбалска лига, а во финалето од Купот на Македонија беше поразен од Силекс.
Од Шкендија упатија благодарност до Беќири за неговиот придонес, професионалност и посветеност, со желби за многу здравје и успеси во продолжението од неговата тренерска кариера.
