Освојувачот на Купот на Македонија, екипата на Силекс, на емотивен начин се прости од еден од најискусните фудбалери во своите редови, откако Милош Николиќ официјално стави крај на својата професионална играчка кариера.
Во натпреварот од последното коло, 37-годишниот фудбалер за последен пат го носеше дресот на кратовскиот клуб, со што беше заокружена една успешна приказна која траеше четири сезони во „сино-црвениот“ табор.
Николиќ во изминатите години беше еден од најважните и најпрепознатливи фудбалери на Силекс. Со своето искуство, лидерски способности и професионален однос остави силен печат во клубот, како на теренот, така и надвор од него. Во дресот на Силекс забележа повеќе од 100 настапи и беше дел од значајни успеси и важни моменти за кратовскиот состав.
Од ФК Силекс со емотивна порака му се заблагодарија за сè што направил за клубот.
„Последен танц за Милош Николиќ – ти благодариме за сè! На денешниот натпревар во рамките на последното коло, дресот на Силекс за последен пат го облече Милош Николиќ, кој по четири сезони минати во нашиот клуб става крај на својата играчка кариера. Николиќ во изминатите четири години остави значаен белег во клубот, носејќи искуство, лидерство и професионализам на теренот и надвор од него. Во „сино-црвениот“ дрес запиша над 100 настапи. Му благодариме за секој настап, секоја борба и секој момент поминат во нашиот град. Му посакуваме многу здравје, среќа и успеси во новото животно поглавје.“
Со завршувањето на кариерата на Николиќ, македонскиот фудбал останува без уште едно искусно и препознатливо име кое во изминатите години беше важен дел од успесите на Силекс.
