Името на Кристијан Пилиповиќ повторно се најде во фокусот на европскиот ракомет, овојпат благодарение на неговите статистички достигнувања во Лигата на шампионите. Голманот на Криенс-Луцерн се наметна меѓу чуварите на мрежата со најмногу интервенции во групната фаза, а неговиот настап сигурно ќе привлече внимание и кај љубителите на ракометот во Охрид.
Хрватскиот интернационалец минатата сезона го носеше дресот на ГРК Охрид, со кој настапуваше во ЕХФ Европскиот Куп, а потоа продолжи во швајцарскиот Криенс-Луцерн. Во актуелната сезона доби можност да се докажува и на најголемата клупска сцена во Европа.
Според статистиката од групната фаза, Пилиповиќ забележал 58 одбрани, со што се најде во друштвото на голманите со најмногу интервенции. Пред него на листата се Сергеј Ернандез од Барселона, Магнус Петерсен од Архус, Небојша Симиќ од Мелсунген и Емил Нилсен од Веспрем, додека зад него се Милјан Вујовиќ од Висла Плоцк и Милош Валах од Вардар, кој има 53 одбрани.
Интересно е што меѓу голманите кои се најдоа високо на статистичките листи има и уште еден познат лик за македонската ракометна публика – вардаровиот Милош Валах, кој е меѓу најдобрите според процентот на успешност.
За охридската публика, Пилиповиќ останува добро познато име од минатата сезона, кога беше дел од тимот на „гладијаторите“. Неговото присуство меѓу истакнатите голмански имиња во Лигата на шампионите е уште една потврда дека Охрид минатата сезона имаше чувар на мрежата со квалитет за настап на највисоко европско ниво.
