Со одигрувањето на петтиот круг од ТОП 6 фазата, практично се стави крај на сезоната за екипите на Кожув и Тиквеш Голден Игл, кои нема да продолжат во плеј-офот. Воедно, веќе се познати четирите екипи кои ќе се борат за шампионската титула, а последното коло ќе биде само формалност без промени на табелата.
И покрај тоа што дилемите се решени, преостануваат уште три натпревари од регуларниот дел кои ќе послужат како подготовка за претстојниот плеј-оф.
Два натпревари се закажани за 30 април. Во Битола, со почеток од 14:30 часот, Пелистер ќе го пречека Тиквеш Голден Игл. Домашниот тим ќе се обиде да ја потврди третата позиција, особено по големата победа на гостински терен против актуелниот шампион МЗТ Скопје, со што ќе влезе во плеј-офот со дополнителна самодоверба, каде повторно ќе се сретне со тимот од Аеродром.
Во вечерниот термин од 20:30 часот, МЗТ Скопје ќе гостува во Маџари кај истоимениот тим. Аеродромци ќе се обидат да ја поправат сликата по поразот од Пелистер и да влезат подготвени во полуфиналната серија.
Последниот натпревар од оваа фаза ќе се одигра на 1 мај во Гевгелија, во салата „26 април“, каде Кожув ќе го пречека лидерот ТФТ со почеток од 19:00 часот.
Иако резултатски нема да има промени, овие дуели ќе бидат добра увертира за она што следува – плеј-оф битката за шампионската титула.
