Второто коло од новата сезона во МТЕЛ Суперлигата донесе нови возбудувања, пресврти и потврда за добриот старт на актуелниот шампион МЗТ Скопје Аеродром и Работнички, додека МКК Куманово стигна до првата победа во шампионатот.
МЗТ Скопје Аеродром славеше на гостувањето кај Кожув во Гевгелија со 81:73, откако по лошиот почеток успеа да ја преземе контролата и да направи пресврт. Домаќините ја добија првата четвртина со 26:18, но шампионот одговори во продолжението и на полувремето имаше минимална предност од 43:42.
Во второто полувреме аеродромци одиграа посигурно, а во завршницата не му дозволија на Кожув да се врати во натпреварот. Маслинко и Николиќ со по 19 поени беа најзаслужни за вториот сезонски триумф на МЗТ. Добра вест за шампионот е и враќањето на Војдан Стојановски по повредата, кој средбата ја заврши со девет поени.
Кај Кожув, Армстронг постигна 17 поени, Бурис 16, Крстевски 15, додека Симиќ забележа дабл-дабл од 14 поени и 12 скока, дополнет со седум асистенции.
- Куманово го надигра Штип во второто полувреме
До првата победа во новата сезона стигна МКК Куманово, кој на домашен терен го совлада ГКК Штип со 70:59. Гостите имаа контрола во првите 20 минути и на паузата водеа со 34:29, но продолжението донесе целосен пресврт.
Кумановци ја добија третата четвртина со 22:13 и пред последниот период поведоа со 51:47. Во завршните десет минути избраниците на Марин Докузовски ја потврдија подобрата игра и стигнаа до заслужен триумф.
Репрезентативците Ѓуроски и Мекиќ беа меѓу главните предводници на победничкиот состав, со заеднички 31 поен. Мекиќ додаде и девет асистенции, Ѓуроски имаше осум скока, а Стевановиќ придонесе со 14 поени.
Кај ГКК Штип, Хамилтон беше најефикасен со 21 поен, Пал постигна 14, а Александровски заврши со 11 поени и пет скока.
- Работнички убедлив против Тиквеш Голден Игл
Работнички продолжи во победнички ритам и ја запиша втората победа во првите две кола, откако во салата „Лазар Лечиќ“ славеше против Тиквеш Голден Игл. „Црвено-белите“ триумфираа со 86:66, решавајќи голем дел од работата уште во првото полувреме.
По почетните 19:12, домашниот состав ја зголеми предноста и по тројката на Говенс во 16. минута поведе со 40:19. На одморот Работнички имаше високи 49:26, а и покрај подобрата игра на гостите во третата четвртина, домаќините ја задржаа контролата и рутински го приведоа натпреварот до крај.
Виктор Ефремовски беше најефикасен кај Работнички со 21 поен. Рикиќ запиша 14 поени и 13 скока, Говенс имаше 12 поени и 11 асистенции, а Дамјан Робев додаде десет поени.
Во редовите на Тиквеш Голден Игл, триото Волф, Смит и Сукс заедно постигна 49 од вкупно 66-те поени на кавадарчани.
Со овие резултати, МЗТ Скопје Аеродром и Работнички го продолжуваат успешниот почеток на сезоната, додека МКК Куманово го отвори својот победнички биланс во новиот шампионат.
