Ракометарите на ГРК Охрид продолжуваат да ја пишуваат најубавата европска приказна, откако обезбедија пласман во полуфиналето на ЕХФ Европскиот куп. Охриѓани и на реваншот беа подобри од Олимпијакос, славејќи со 25-24, што во комбинација со победата од 31-26 во првиот натпревар им донесе сигурно место меѓу четирите најдобри.
Во одлична атмосфера пред исполнетите трибини во СЦ „Билјанини Извори“, избраниците на Борис Ројовиќ уште од стартот ја презедоа контролата врз играта. Домашниот тим во неколку наврати имаше предност од неколку голови, а на полувреме замина со водство од 14-12.
Во вториот дел, грчкиот состав се обиде да направи пресврт и во еден момент стигна до минимална предност, но Охрид не дозволи комплетно изненадување. Во клучните моменти, „гладијаторите“ покажаа карактер, повторно го презедоа водството и во драматична завршница ја заверија победата и големиот успех.
Најефикасен во редовите на Охрид беше Анте Иванковиќ со осум погодоци, додека Томи Јагуриновски додаде четири. Значаен придонес дадоа и Вуко Борозан и Дарко Ѓукиќ со по три гола, додека голманот Кристијан Пилиповиќ блескаше на голот со двоцифрен број одбрани. Кај гостите, Савас Савас се издвои со пет реализации.
Со овој историски пласман, ГРК Охрид си закажа полуфинална пресметка со РК Целје, во двомеч кој ќе решава за патникот во големото финале.
Охрид живее европски сон – а следната станица е уште поголем предизвик и нова можност за испишување историја.
