Екипата на Пелистер приреди големо изненадување во прволигашкото коло, откако славеше на гостувањето кај Шкендија со 2-1, правејќи значаен чекор во борбата за опстанок.
Битолчани поведоа во првиот дел преку Спировски, по добра асистенција од Булатовиќ, но домашните израмнија преку Ибраими пред паузата. Во второто полувреме Шкендија беше поофанзивна и создаде неколку сериозни шанси, но гостинскиот голман Јовчевски беше на висина на задачата. Казната стигна во судиското продолжение, кога Керим со прецизен удар донесе голема победа за Пелистер.
Во меѓувреме, Вардар продолжи со сигурните настапи и убедливо го доби градското дерби против Македонија ЃП со 5-1 на арената „Тодор Проески“.
„Црвено-црните“ доминираа во текот на целиот натпревар, а отпорот на противникот дополнително беше ослабен по раното исклучување на Кабаркас. Стрелци за Вардар беа Велковски, Кастенада, Торес (два гола) и Николов, додека почесниот погодок за Македонија ЃП го постигна Галевски.
Со ваквиот развој на настаните, Вардар ја задржува лидерската позиција, додека Пелистер освојува злато вредни бодови во битката за опстанок во Првата лига.
