Дмитро Хориха и официјално ќе може да го носи дресот на македонската ракометна репрезентација, откако доби зелено светло од Светската ракометна федерација. Неговото приклучување кон националниот тим беше една од главните теми на прес-конференцијата што денеска се одржа во просториите на РФМ, на која присуствуваа претседателот Александар Стефанов и селекторот Кирил Лазаров.
Претседателот на Ракометната федерација на Македонија изрази задоволство од можноста Хориха да биде дел од репрезентацијата. Според Стефанов, станува збор за ракометар кој се наоѓа во најзрелата фаза од кариерата и од кого се очекува да донесе дополнителен квалитет и да помогне во остварувањето подобри резултати.
,,Мислам дека добиваме еден ракометар што ќе даде тежина и голем придонес, тој е во зенитот на својата кариера и се надеваме дека со него ќе добиеме на квалитет и ќе придонесе и тој за подобри резултати во иднина.“- изјави Стефанов.
Хориха во моментов настапува за унгарскиот ПИК Сегед, а неговото вклучување во репрезентацијата доаѓа во пресрет на квалификациските средби против Луксембург и Грција. Стефанов посочи дека Македонија ги очекува овие предизвици со високи амбиции и јасна цел да обезбеди учество на Европското првенство во 2028 година.
Со официјализирањето на правото на настап на Хориха, македонската репрезентација добива уште една опција пред важните квалификации, во кои главниот приоритет ќе биде обезбедување место меѓу учесниците на следниот континентален собир.
