Екипата на Младост во рамките на седмата рунда на Суперлигата ќе гостува кај Куманово, целта е јасна – прва сезонска победа за радост во тимот, но и за целата верна публика од Богданци.
Иако Младост имаше мечеви на кои беше блиску до победа, сепак и натаму чека на истата. Еден од поискусните играчи во тимот, Владимир Бојаниќ за Спортска Мрежа потенцираше дека искуството е пресудно како на мечевите со Прилеп и Еурофарм Пелистер, надполнувајќи дека во тимот има играчи кои по првпат играат Суперлига.
„Мислам дека искуството беше пресудно и на првиот и на вториот натпревар. И Еурофарм Пелистер 2 и Прилеп имаат многу поискусни играчи во своите редови, момци кои веќе неколку сезони, па и повеќе, играат во Суперлигата. Кај нас нема толку искуство, со оглед на тоа што некои од момците за првпат играат во Суперлигата. Што се однесува до натпреварот со Прилеп, мислам дека и ние направивме неколку недозволиви грешки“, вели Бојаниќ.
Притисок нема, почеток на сезоната е и има уште многу натпревари, во Куманово ќе го дадеме максимумот, вели Србинот, кој летово го засили Младост од Охрид.
„Кај нас нема притисок. Тек е седмото коло, има уште многу да се игра и да се воигруваме. Мислам дека играме сè подобро и подобро. Не е лесно веднаш да се вклопи нова екипа. За нас секој бод е важен. Во Куманово не одиме однапред да се предадеме, туку одиме да се бориме, да го дадеме максимумот, да ги намалиме грешките и да одиграме добар натпревар“, дополнува Србинот.
Натпреварот меѓу Куманово и Младост се игра во сабота, со почеток од 16:30 часот во салата „Перо Наков“.
