Во сабота со почеток од 18 часот, градскиот стадион во Штип ќе биде епицентарот на фудбалските случувања во Втората македонска лига, каде силите ќе ги одмерат Брегалница и Охрид во рамки на 22. коло.
Станува збор за директна пресметка на врвот, во која лидерот Охрид со 49 бодови гостува кај четвртопласираната Брегалница која има 46, што значи дека само три бода ги делат двете екипи. Со оглед дека само првата позиција носи директен пласман во Првата лига, влогот е огромен и за двете страни.
Традицијата е на страната на „сините“ од Штип, кои доминираат во меѓусебните дуели, додека Охрид чека победа над овој ривал цели 17 години. Тоа дополнително го зголемува притисокот врз „рибарите“, кои ќе се обидат да ја прекинат негативната серија токму во најважниот момент од сезоната.
Во Штип веќе се чувствува дерби атмосфера – градот е мобилизиран, навивачите се подготвуваат за спектакл, а бесплатниот влез е дополнителен мотив трибините да бидат исполнети до последно место. Поддршката за Брегалница се очекува да биде огромна, што може да биде значаен фактор на теренот.
Дополнителен импулс за домаќините е и новиот претседател Ангел Бојаџиев, со што веќе се започна со подобрување на условите, вклучително и теренот, со цел екипата да има максимални предуслови за успех.
Овој натпревар може директно да влијае на врвот на табелата. Со евентуален пораз или реми, Охрид ризикува да ја загуби лидерската позиција, особено ако конкурентите ги искористат своите шанси во останатите натпревари од колото.
Сабота носи дерби со огромен влог – Штип ќе гори, а исходот може да ја насочи трката за Првата лига.
