Ракометарите на Еурофарм Пелистер 2 стигнаа до победа над Радовиш со 34-31 во натпревар од второто коло на плеј-аут фазата во македонската ракометна Суперлига.
Домашниот состав одигра подобро во првото полувреме и успеа да создаде солидна предност, па на паузата замина со 18-13. Битолчани го контролираа резултатот и во најголемиот дел од вториот дел, но гостите не се предадоа.
Ракометарите на Радовиш во завршницата покажаа карактер и со серија голови успеаја да се доближат на само еден гол негатива (32-31) на две минути пред крајот. Сепак, домашниот тим успеа да одговори во следниот напад и да ја задржи предноста, а до крајот го потврди триумфот со конечни 34-31.
Најефикасни кај победничкиот тим беа Мохамед Азиз и Одифред Баптист со по седум погодоци, додека кај Радовиш најпрецизен беше Славе Јанковски со осум гола.
Во следното коло Еурофарм Пелистер 2 ќе гостува кај Куманово, додека Радовиш на домашен терен ќе го пречека тимот на Пролет.
