МКК Куманово е победник на првиот меморијален турнир „Зоран Петковски – Петкото“, кој во изминатите два дена се одржа во спортската сала „Боро Чурлевски“ во Битола.
Кумановци до трофејот стигнаа со две победи. Во полуфиналето, МКК Куманово беше подобар од домаќинот Пелистер со 80:61, додека во финалето славеше над ТФТ со 75:64 и го освои победничкиот пехар на првото издание на меморијалниот турнир посветен на Зоран Петковски – Петкото.
Третото место му припадна на МЗТ Скопје Аеродром. Актуелниот македонски шампион во натпреварот за третото место го совлада Пелистер со убедливи 85:63.
За најкорисен играч (МВП) на дводневниот меморијален турнир во Битола беше избран кошаркарот на МКК Куманово, Стојан Ѓуроски.
Репрезентативното крило на кумановските „сино-бели“ одигра два одлични натпревари и со своите настапи даде значаен придонес во освојувањето на трофејот. Ѓуроски сосема заслужено ја доби главната индивидуална награда на првото издание на меморијалниот турнир „Зоран Петковски – Петкото“.
