Женскиот ракометен клуб Овче Поле – Славјански Универзитет од Свети Николе активно се подготвува за стартот на новата сезона во Првата женска ракометна лига.
Екипата неколку денови престојуваше во живописниот Претор, каде комбинацијата на утрински тренинзи на свеж воздух и релаксација покрај Преспанското Езеро создаде совршени услови за подигнување на формата и зајакнување на тимскиот дух.
„Ова не се само подготовки – ова е зајакнување на тимската хемија, создавање нови спомени и поставување повисоки цели,“ порачуваат од клубот.
Овче Поле СУ сезонава ќе биде дел од новоформираната Прва женска лига, каде ќе настапат вкупно седум екипи: Шампион, Јехона, Атлетик, Ѓорче Петров 2, Стружанка, Деспина и тимот од Свети Николе.
Првиот предизвик за девојките од Овче Поле СУ ќе биде на домашен терен во Свети Николе, каде во рамки на воведното коло на 5/6 септември ќе ја пречекаат екипата на Ѓорче Петров 2.
Со нови засилувања, свежа енергија тимот во новата сезона ќе атакува за висок пласман и влез во Суперлигата.
