Со 14 екипи во недела ќе започне новата сезона 2026/27 во Општинската фудбалска лига – Струмица. Ждрепката е закажана за утре, кога ќе бидат одредени натпреварувачките парови за првото коло, но и распоредот за целата сезона.
Новата сезона носи интересен спој на екипи кои во минатото настапувале во Третата лига, неколку дебитанти, како и клубови кои повторно се враќаат на фудбалската карта. Со тоа, ОФЛ Струмица се очекува да понуди интересна сезона, но уште поважно е што фудбалот повторно ќе заживее во повеќе населени места.
Со враќањето на клубовите на терените, се враќаат и атмосферата и традицијата на локалниот фудбал – публика покрај терените, навивање за омилената екипа, но и неизбежните пиво и скара како дел од фудбалскиот амбиент во струмичките населени места.
Според информациите на Спортска Мрежа, во новата сезона ќе настапат шест екипи кои беа дел од ОФЛ Струмица и минатата сезона: Интер Кукла од Куклиш, Грозд од Дрвош, Слога од Злеово, Единство од Пиперево, Илинден од Добрејци, Спартмани од Градско Балдовци и Напредок Здравје од Радово.
Лигата добива и неколку интересни повратници и нови имиња. Василево, поранешен третолигаш, по неколку сезони повторно се реактивира и се враќа на фудбалската карта. Во конкуренција ќе бидат и Подгор КМБМ од Колешино, Банско Дијаспора, Струмешница од Зубово, Младост Муртино Академија, Сачево, како и Готен од Подареш, кој повторно ќе биде активен по пауза од речиси една година.
Список на екипи во ОФЛ Струмица 2026/27:
ФК Интер Кукла – Куклиш
ФК Василево – Василево
ФК Подгор КМБМ – Колешино
ФК Банско Дијаспора – Банско
ФК ЗСФК Слога Унион – Злеово
ФК Грозд – Дрвош
ФК Струмешница – Зубово
ФК Младост Муртино Академија – Муртино
ФК Единство – Пиперево
ФК Илинден – Добрејци
ФК Готен – Подареш
ФК Спартмани – Градско Балдовци
ФК Напредок Здравје Радово – Радово
ФК Сачево – Сачево
Ждрепката утре ќе го даде распоредот на натпреварите за првото коло, но и целокупниот натпреварувачки календар за сезоната.
На крајот од сезоната, шампионот на Општинската фудбалска лига – Струмица ќе стекне право на настап во Трета лига – регион 3 во сезоната 2027/28, што дополнително ќе им даде мотив на клубовите за борба за врвот.
Новиот шампионат носи враќање на фудбалот во повеќе струмички населени места, реактивирање на клубови и нова можност за локалните екипи да се борат за место во регионалниот третолигашки ранг.
