Второлигашот Пелистер продолжува со засилувањето на играчкиот кадар во пресрет на новата сезоната, а во таборот на битолскиот клуб пристигнаа две нови имиња.
20-годишниот бек Марко Стојиливески е нов фудбалер на Пелистер. Младиот дефанзивец доаѓа по кратката епизода во Смедерево, а претходно беше дел и од Брера Струмица. Стојиливески во Пелистер ќе има можност да продолжи со својот развој и да се наметне во составот на битолскиот тим.
Покрај него, ново офанзивно засилување за Пелистер е и 31-годишниот Иван Ивановски. Искусниот фудбалер има богата кариера и добро го познава македонскиот фудбал, каде што настапувал за Тиквеш, Гостивар и Силекс.
Ивановски има и интернационално искуство. Во Босна и Херцеговина го носеше дресот на Звјезда од Градачац, додека настапуваше и во Јордан, каде што кратко беше дел од Ал Рамта.
Со ангажманот на Стојиливески и Ивановски, Пелистер добива млад дефанзивец и искусен офанзивец, а клубот продолжува да го гради составот со кој ќе се обиде да оствари што подобар резултат во второлигашката конкуренција.
