Иван Сапунџиев по две години повторно го облече дресот на Пелистер, а повратникот во Битола верува дека младата екипа има голем потенцијал и желба за докажување.
„Имаме доста помлада екипа од досегашните и верувам дека ќе биде „погладна“ за докажување. Сигурен сум дека момците се спремни да остават име во македонската кошарка“, вели Сапунџиев.
Искусниот бек очекува изедначена сезона во домашното првенство, во која секој натпревар може да биде важен за конечниот пласман.
„Мислам дека ни следи изедначена сезона. Домашниот терен е клучен во скоро сите натпревари. Секое изненадување на гостински терен, без разлика дали сме ние или некои други екипи, ќе биде голем плус“, додава Сапунџиев.
Сапунџиев за Пелистер настапуваше од 2022 до 2024 година, а во новата сезона повторно ќе биде дел од битолскиот состав, кој претрпе значителни промени во ростерот.
