Македонската тенисерка Лина Ѓорческа не успеа да ја помине првата пречка во квалификациите за УС Опен. На стартот од квалификацискиот турнир, Ѓорческа загуби од Јапонката Маи Хонтама со 0:2 во сетови (6:7, 3:6), по 106 минути игра.
Во првиот сет двете тенисерки направија по три брејка, но Хонтама во поголемиот дел од сетот имаше предност. Јапонката поведе со 2:0 и 4:1, но Ѓорческа успеа да се врати и да израмни на 5:5. Сепак, во тај-брејкот Хонтама поведе со убедливи 6:0 и го освои сетот за водство од 1:0.
Во вториот сет Хонтама повторно стартуваше подобро и поведе со 2:0. Ѓорческа успеа да израмни на 3:3, но потоа Јапонката направи два брејка и со серија од три гема го освои сетот со 6:3, со што го обезбеди пласманот во следната рунда.
Ѓорческа натпреварот го заврши со 33 неизнудени грешки, додека Хонтама имаше 15. Македонската тенисерка имаше и сериозни проблеми со сервисот, направувајќи дури 12 двојни грешки.
За настапот во квалификациите на УС Опен, Ѓорческа освои два ВТА поени и награда од 32.000 американски долари.
