Вардар 1961 го очекува последниот предизвик во групната фаза од Лигата на шампионите, во кој на домашен терен ќе ги одмери силите со германскиот Мелсунген. Иако македонскиот шампион веќе нема шанси да обезбеди место во главната рунда, „црвено-црните“ имаат мотив плус да стигнат до нова победа пред својата публика.
Избраниците на Иван Чупиќ ќе се обидат со позитивен резултат да го заокружат европскиот настап во елитното натпреварување, пред продолжението на сезоната во Европската лига. Од другата страна, гостите од Германија пристигнуваат во Скопје со шест бода и со јасна цел – да останат во трката за пласман во следната фаза.
Борбата за двете места во главната рунда е особено неизвесна, бидејќи Мелсунген, Висла Плоцк и Нант пред последното коло имаат идентичен бодовен учинок. Германците во претходното коло направија важен чекор со победата над Висла со 28-26, па во Скопје ги очекува уште еден натпревар со голема тежина.
Вардар, пак, има можност да му се реваншира на ривалот за поразот во првата пресметка. На гостувањето во Касел, Мелсунген славеше со 33-31, но скопјани до последните минути беа во игра за поволен исход. Сега, со поддршка од трибините во „Јане Сандански“, ќе се обидат да возвратат и да стигнат до втор триумф во групната фаза.
Во пресрет на овој дуел, вардарци се во добра форма. Победите над Нант, Бутел и Прилеп донесоа дополнителна самодоверба, а особено одекна гостинскиот триумф во Франција, каде што македонскиот тим го совлада Нант со 33-27.
Средбата меѓу Вардар 1961 и Мелсунген е закажана за денеска со почеток во 18:45 часот, а домашниот состав ќе се обиде европската приказна во Лигата на шампионите да ја заврши со победнички печат.
