Вистинска ракометна драма донесоа двата натпревари од вториот ден на турнирот „Миле Нешкоски“ во Прилеп, по кои се познати финалистите. Домаќинот Прилеп и Тиквеш обезбедија место во битката за трофејот, откако на различен начин стигнаа до победи над Младост Богданци и Еурофарм Пелистер 2.
Прилеп продолжи со одличните настапи на турнирот и по вторпат славеше, овојпат против новиот суперлигаш Младост Богданци со 31-27. Гостите имаа подобар почеток и долго време ја контролираа играта, а во еден момент водеа и со четири гола.
Младост имаше предност 14-10, но Прилеп во продолжението покажа сосема поинакво лице и ја стопи предност. Во последните 15 минути Прилеп ја подигна енергијата, а голманот Трајкоски со неколку важни интервенции помогна да се скрши отпорот на богданчани.
Димитар Димитриоски со седум гола беше најефикасен кај Прилеп, шест постигна Ангел Крстески, додека кај Младост Богданци се истакна Даниел Андоновски со осум погодоци како прв стрелец.
За Младост, и покрај поразот, натпреварот покажа напредок во однос на првата контролна средба против Куманово. Екипата полека се воигрува, новите засилувања се вклопуваат во системот на тренерот Горан Андоновски, а подготовките преку натпреварите на турнирот се користат за подигнување на формата и усовршување на тактичките замисли пред новата сезона. Резултатот не е во прв план за богданчани во оваа фаза од подготовките.
Уште поголема драма донесе другиот натпревар, во кој Тиквеш направи нов спектакуларен пресврт и го совлада Еурофарм Пелистер 2 со 28-27.
Младите битолчани одлично го започнаа дуелот и на паузата имаа четири гола предност, 14-10. Во вториот дел Еурофарм Пелистер 2 успеваше да ја одржува разликата, а во еден момент имаше и 23-19.
Тогаш следуваше големиот кам-бек на кавадарчани. Тиквеш започна да ја топи негативата, стигна до 24-23 и до крајот се играше гол за гол. Во последните секунди се случи кулминацијата – при резултат 27-27, Тиквеш доби седмерец по фаул врз Димковски, а Симоновски од битолскиот состав заработи црвен картон.
Одговорноста ја презеде Бен Махфуд, кој го реализираше пеналот и му донесе победа на Тиквеш со 28-27.
Томислав Димковски беше најдобар стрелец кај победничкиот состав со седум гола, додека кај Еурофарм Пелистер 2 шестпати погоди Александар Стојков.
Со двете победи, Прилеп и Тиквеш обезбедија пласман во големото финале на турнирот „Миле Нешкоски“, каде што ќе се борат за трофејот. Финалето е закажано за недела од 20:00 часот.
Победниците од соочувањата меѓу Бутел и Еурофарм Пелистер2, како и меѓу Младост и Мулти Есенс ќе играат за трето место, додека пак поразени од овие два натпревари ќе играат за петто место на турнирот „Миле Нешкоски“ во Прилеп.
