Македонската кадетска репрезентација со убедлив триумф над Кипар го започна настапот на Европското првенство од Дивизијата „Б“. По натпреварот, селекторот Дејан Стојановски изрази задоволство од енергијата и пристапот на своите избраници, но истакна дека тимот има простор за подобрување.
Стојановски посебно ја истакна поддршката од трибините и атмосферата која ја создадоа навивачите, посочувајќи дека токму таква енергија сакал да види и од своите кошаркари.
„Добар прв чекор. Како што кажав и пред почетокот на првенството, одиме чекор по чекор.
Задоволен сум од енергијата што ја покажаа момците. Токму тоа сакавме да го видат и нашите навивачи. Воодушевен сум од поддршката од трибините и се надевам дека утре ќе имаме уште поголема публика.
Секако, има работи што мора да ги поправиме. Имавме премногу загубени топки и тоа не смее да ни се повторува. Против ваков противник, во одредени моменти требаше да играме помирно и пострпливо. Но, ова се млади момци, атмосферата ги понесе и тоа е разбирливо.
Од овој момент целосно сме насочени кон следниот натпревар. Ќе го анализираме Исланд и ќе се подготвиме максимално, затоа што сакаме да го направиме и вториот чекор, односно да стигнеме до нова победа.
Очекувам Исланд да игра со многу енергија, па ќе мора да бидеме подготвени за голема борба во скокот. Ако успееме да го контролираме тој сегмент од играта, ќе можеме да трчаме, а тоа е стилот што го сакаме – брза кошарка со што повеќе отворени шутеви.“
