Еурофарм Пелистер 2 се врати на победничките патеки во Суперлигата, откако во Битола го совлада Куманово со 36-30 и стигна до вториот триумф сезонава.
Домашниот состав подобро го отвори натпреварот и во најголемиот дел од првото полувреме ја имаше контролата. Куманово успеваше да одржи чекор, па на паузата битолчани заминаа со минимална предност од 16-15.
Одлучувачкиот период дојде на стартот на вториот дел. Еурофарм Пелистер 2 наметна посилен ритам и од 18-16 брзо стигна до 21-16. Иако во тој период домашните останаа и без капитенот Стефан Дрогришки, кој заработи црвен картон, битолчани продолжија да го контролираат натпреварот и до крајот не дозволија пресврт.
Најефикасен кај победникот беше Симоноски со осум гола, додека Лозановски, Димевски и Гутиќ постигнаа по шест. Кај Куманово, Костов и Радван завршија со по осум погодоци.
Со оваа победа Еурофарм Пелистер 2 стигна до четири бода, додека Куманово останува со еден освоен бод.
