Македонскиот прволигаш Тиквеш продолжува со формирањето на ростерот за новата сезона, а најново засилување во редовите на кавадаречкиот клуб е српскиот дефанзивец Никола Влајковиќ.
Станува збор за 30-годишен искусен фудбалер кој веќе добро ги познава условите во македонскиот фудбал, откако претходно го носеше дресот на Струга Трим Лум, со која ја освои шампионската титула. Во Кавадарци пристигнува од бугарскиот прволигаш Ботев Враца, а зад себе има богата кариера и настапи во Србија за Јагодина, Нови Пазар, Раднички Крагуевац и Раднички Ниш.
Од Тиквеш истакнуваат дека Влајковиќ е искусен, борбен и докажан дефанзивец кој одлично ги познава предизвиците на балканскиот фудбал и домашното првенство, а неговиот професионален пристап, карактер и квалитет треба да донесат дополнителна сигурност во последната линија на тимот.
Во клубот веруваат дека српскиот интернационалец ќе биде едно од важните засилувања во сезоната што претстои и ќе придонесе во исполнувањето на амбициите на Тиквеш.
Инаку, кавадаречкиот прволигаш во моментов се наоѓа на подготовки во Турција, каде покрај одигрувањето контролни натпревари, стручниот штаб продолжува да тестира и други потенцијални засилувања пред почетокот на новата натпреварувачка сезона.
