Македонскиот одбојкарски шампион Штип УГД го дозна својот ривал за дебитантскиот настап во ЦЕВ Лигата на шампионите. На денешната ждрепка во Луксембург, штипјани за противник во првото квалификациско коло го добија актуелниот шампион на Холандија, Орион Старс, еден од поквалитетните тимови во оваа фаза од натпреварувањето.
За тимот предводен од Кристиан Ристески ова ќе биде уште едно историско поглавје, откако минатата сезона ја освои двојната круна во македонската одбојка и за првпат обезбеди место во најелитното европско клупско натпреварување.
Првиот натпревар ќе се одигра во Холандија во периодот од 20 до 22 октомври, додека реваншот е закажан во Штип од 27 до 29 октомври, кога македонскиот шампион ќе се обиде пред својата публика да направи чекор кон следната квалификациска рунда.
Доколку успешно ја мине холандската пречка, Штип УГД во второто квалификациско коло ќе се сретне со словенечкиот АЦХ Волеј Љубљана. Во тој случај, првиот натпревар би се играл во Македонија од 3 до 5 ноември, а реваншот во Словенија во периодот од 10 до 12 ноември.
Штипјани ги очекува тежок, но и мотивирачки европски предизвик, со можност уште еднаш да го потврдат својот квалитет и достоинствено да ја претставуваат македонската одбојка на највисоката европска сцена.
Минатата сезона клубот испиша историја освојувајќи ја првата шампионска титула и двојната круна, а претходно веќе стекна и европско искуство настапувајќи во Џелинч Купот, што дополнително ќе биде значајно пред претстојните дуели со холандскиот шампион.
