Нов предизвик за најмладата машка ракометна селекција на Македонија- пионерската репрезентација ги започна подготовките за премиерниот турнир од Регионалната лига, на кој ќе ги одмери силите со врсниците од Црна Гора и Косово.
Селекторот Никола Матлиески за оваа акција повика 16 ракометари од југозападниот регион, кои ќе ја претставуваат Македонија на натпреварите во Подгорица. Регионалниот принцип ќе продолжи и на следниот турнир, кога можност да настапат ќе добијат ракометарите од североисточниот дел на земјата, а домаќин на таа средба ќе биде Македонија.
Првиот натпревар нашите пионери ќе го одиграат в петок против домаќинот Црна Гора, со почеток во 18:00 часот. Веќе в сабота ги очекува нов дуел, овојпат против селекцијата на Косово, закажан за 13:00 часот.
Настапите во Регионалната лига ќе бидат можност младите македонски ракометари да стекнат меѓународно искуство, да го покажат својот потенцијал и да направат уште еден чекор во својот ракометен развој.
