Македонската тенисерка Лина Ѓорческа го заврши настапот уште во првото коло на ВТА 125 турнирот во Рим, откако беше поразена од домашната тенисерка Дебора Киеза со 2:1 во сетови (6:7(1), 6:3, 6:3). Натпреварот траеше 162 минути.
Дуелот беше неизвесен и израмнет, а двете тенисерки уште еднаш покажаа дека добро се познаваат, бидејќи ова беше нивни шести меѓусебен натпревар во последните четири години. Во првиот сет двете направија по два брејка, а победникот беше решен во тај-брејк, каде што Ѓорческа по почетното водство на Киеза освои седум поени во низа и поведе со 1:0 во сетови.
Во вториот сет беа одиграни дури седум брејка во девет гема. Киеза успеа да ги добие првиот и последниот гем на свој сервис и со 6:3 го израмни резултатот. Во решавачкиот сет македонската тенисерка повторно имаше проблеми со сервисот, што Италијанката го искористи и направи три брејка за конечна победа.
Статистички, Ѓорческа реализираше шест брејка од 14 можности, додека Киеза искористи осум од своите 21 брејк-шанси.
Со овој триумф, Дебора Киеза го зголеми водството во меѓусебните дуели на 4:2.
За Ѓорческа следува нов предизвик веќе следната недела, кога ќе настапи на ВТА 125 турнирот во Палермо.
