Машката репрезентација на Македонија за кошаркари до 18 години влегува во завршниот дел од подготовките за настапот на Европското првенство од Дивизијата „Б“, кое ќе се одржи во Опатија и Ријека, Хрватска.
По двата контролни натпревари против Бугарија во Ботевград, селекторот Миодраг Тодоровиќ изрази задоволство од прикажаното, нагласувајќи дека и покрај бројните проблеми во подготвителниот период, тимот покажал карактер и квалитет.
„Задоволен сум од желбата и пристапот на сите натпревари. Имавме доста неочекувани повреди, присутен е и заморот од подготовките, што е сосема нормално во овој период. Но, овој тим го има најважното – одлична хемија и суров квалитет“, изјави Тодоровиќ.
Македонските јуниори во наредните денови ќе ги одработат последните тренинзи и ќе ги завршат подготовките пред заминувањето за Хрватска. Во конкуренција остануваат 14 кошаркари, а селекторот наскоро ќе го одреди конечниот состав што ќе ја претставува Македонија на Европското првенство во Опатија и Ријека.
