Второлигашот Кожуф вчера официјално ги започна подготовките за новата сезона 2026/27, со првиот тренинг означувајќи го стартот на новиот натпреварувачки циклус.
Во гевгелискиот клуб владее позитивна атмосфера, а амбициите се јасни – подобар пласман од минатата сезона и сигурен опстанок во Втората македонска фудбалска лига.
Клубот го задржа костурот на тимот, а во новата сезона екипата ќе ја предводи Благој Дуганов, кој ќе биде нов шефот на стручниот штаб. Во неговиот стручен штаб ќе бидат и Стојче Крчев и Трајче Ников.
Кожуф веќе ги реализираше и првите две засилувања. Нови фудбалери на тимот се Саше Дуков, кој пристигнува од Детонит Плачковица, како и Марио Симоски од Осогово. Покрај нив, во моментов неколку играчи, претежно од источниот регион, се на проба, а раководството планира до почетокот на сезоната да ангажира уште пет до шест нови засилувања.
Во рамки на подготовките, Кожуф ќе одигра четири пријателски натпревари. На 25 јули ќе се сретне со Новаци, на 28 јули противник ќе биде Беласица, на 1 август ќе игра против Брера Струмица, додека генералната проверка пред стартот на првенството е закажана за 8 август против Детонит Плачковица.
Од клубот порачаа дека новата сезона ја започнуваат со голема мотивација и максимална посветеност.
„Нашиот прв тим ги започна подготовките за сезоната што е пред нас и го одработи првиот тренинг. Со нова енергија, голема желба и максимална посветеност, тргнуваме во нова битка за боите на клубот. Секој тренинг, секој натпревар и секоја минута на теренот ќе бидат борба за грбот што го носиме на градите и за сите кои живеат за овој клуб. Пред нас има многу работа, но веруваме во нашиот тим, во заедништвото и во поддршката од нашите верни навивачи“, велат од второлигашот од Гевгелија.
