Македонската ракометна икона Стојанче Стоилов е пред нов предизвик во својата кариера – за првпат ќе биде главен тренер на еден суперлигашки клуб. Легендарниот поранешен капитен на Вардар ќе седне на клупата на РК Бутел Скопје и ќе ја предводи екипата од следната сезона.
По завршувањето на блескавата играчка кариера, Стоилов веќе извесен период беше дел од тренерските води, како асистент во Вардар, а воедно е и член на стручниот штаб на македонската репрезентација. Сега, пред него е првиот самостоен ангажман како шеф на стручен штаб.
Стоилов доаѓа на местото на Горан Кузманоски, кој по завршувањето на сезоната ќе замине во Кипар каде ќе ја продолжи кариерата. До тогаш, актуелниот тренер ќе го води тимот, по што ќе следи официјалното преземање на функцијата од страна на Стоилов.
Во Бутел Скопје веруваат дека неговото огромно искуство, авторитет и познавање на македонскиот ракомет ќе донесат нова енергија и дополнителен квалитет во тимот, кој и во иднина има амбиции за висок пласман во Суперлигата.
Официјалната промоција на Стоилов се очекува да се одржи наскоро, кога клубот ќе ги претстави и плановите за следната сезона.
