Струмица повторно ќе биде во знакот на трчањето, спортот и позитивната енергија. Петтото издание на градската трка „Струмица на улица – Sunday run“ ќе се одржи на 1 ноември 2026 година, а интересот за настанот веќе е голем, со повеќе од 250 пријавени тркачи.
Учесниците ќе имаат можност да изберат една од трите дисциплини: трка на 5 километри, 10 километри или полумаратон на 21,1 километар. Пријавувањето се одвива преку официјалната веб-страница www.strumicanaulica.mk.
Сите заинтересирани што ќе се пријават најдоцна до 18 октомври ќе добијат загарантирана Dri-Fit маица со специјален дизајн во рамките на стартниот пакет.
Генерален партнер на јубилејното петто издание е брендот Sunday на компанијата Колид С, а организацијата е поддржана и од повеќе компании од Струмица и регионот.
Организаторите најавуваат унапредено искуство за учесниците, со поголем организациски тим, подобра опрема и поддршка од партнерите кои веруваат во развојот на настанот. Нивната цел е трката да прерасне во уште поквалитетна спортска манифестација, која ќе ги обедини љубителите на трчањето од земјава и регионот.
„Трката постои пет години и луѓето ја сакаат. Она што досега недостасуваше е организација што ќе ја крене на ниво на кое Струмица заслужува. Оваа година го правиме токму тоа – со поголем тим, со подобра опрема и со партнери кои веруваат во настанот. И годинава целта е јасна: да ги обединиме тркачите од земјава и регионот на улиците каде што сме најсреќни. Заедно испраќаме порака дека спортот е простор што поврзува генерации, луѓе и различни приказни“, изјавија членови на организацискиот тим.
Трката ќе се одвива низ градските улици на Струмица, а за сите учесници ќе биде обезбедено електронско мерење на времето преку чип, како и станици за освежување распоредени долж патеката. Секој тркач што ќе ја мине целта ќе добие и финишерски медал, како спомен на учеството во ова спортско доживување.
Во изминатите години, „Струмица на улица – Sunday run“ прерасна во настан што ги поврзува различните генерации, поттикнува нови атлетски успеси и ја зајакнува локалната гордост и заедничкиот дух. Петтото издание е можност оваа приказна да продолжи да се развива и да привлече уште поголем број учесници.
На 1 ноември, улиците на Струмица повторно ќе бидат исполнети со тркачи, навивачи и љубители на спортот, во настан кој испраќа јасна порака дека трчањето не е само натпревар, туку и начин луѓето да се поврзат и заедно да создаваат позитивна спортска приказна.
