Македонскиот репрезентативец Александар Трајковски и официјално има нов клуб. Искусниот офанзивец беше претставен како ново засилување на Локомотива Загреб, со која потпиша договор најмалку до крајот на тековната сезона.
По извесен период без клуб, вториот најдобар стрелец во историјата на македонската репрезентација се реши за нов предизвик во добро позната средина. Хрватската лига не му е непознаница – токму таму го изгради дел од своето име преку настапите за Хајдук и Интер Запрешиќ, каде зад себе остави силен впечаток.
Од Локомотива со гордост го претставија својот нов играч, нагласувајќи го неговото богато искуство и квалитет што треба да донесе дополнителна сила во офанзивниот ред. Хрватскиот клуб во своето соопштение потсети и на хет-трикот што Трајковски го постигна токму против Локомотива во последното коло од минатата сезона, настапувајќи за Хајдук – дуел кој остана запаметен како негово едно од најдоминантните изданија.
Со трансферот на „Кајзерица“, Трајковски добива можност повторно да биде дел од конкурентно европско првенство и да се наметне со своето искуство, додека Локомотива добива проверен играч кој може веднаш да направи разлика.
