Кошаркарската федерација на Македонија и официјално го промовираше Жозеп Мариа Берокал за нов селектор на машката сениорска репрезентација. На прес-конференцијата одржана во хотелот „Александар Палас“ во Скопје, пред новинарите се обрати претседателот на федерацијата, Томе Главчев.
Главчев истакна дека назначувањето на Берокал претставува важен чекор во создавањето нова енергија и јасна визија за иднината на националниот тим. Тој потенцираше дека шпанскиот стручњак доаѓа со богато меѓународно искуство, препознатлива кошаркарска филозофија и професионален пристап, од кои се очекува да донесат квалитет и стабилност во работата на репрезентацијата.
Во стручниот штаб на новиот селектор ќе биде вклучен и домашниот тренер Ѓорѓи Кочов, кој ќе ја извршува функцијата асистент и ќе претставува важна врска меѓу меѓународното искуство и македонската кошаркарска школа.
Дополнителна улога во координацијата и стратешкото поврзување на сите национални селекции ќе има директорот – координатор на репрезентациите, легендарниот Владо Илиевски, чиe искуство и авторитет треба да придонесат за создавање стабилен и долгорочен систем.
Од КФМ нагласуваат дека федерацијата останува посветена на професионализација, развој на домашните играчи и враќање на препознатливиот репрезентативен дух, со цел македонската кошарка повторно да се врати на нивото кое го заслужува.
