Вечерва се одиграа натпреварите од првата елиминациска фаза во ракометниот Куп на Македонија, а фаворитите во најголем дел ја оправдаа улогата.
Младост Богданци продолжува во победнички ритам. Лидерот во Првата лига славеше убедлива победа од 36:22 против Текстилец и уште еднаш ја потврди победничката форма. Тимот од Богданци сериозно чекори кон враќање во Суперлигата.
Прволигашот Јехона на домашен терен во Гостивар загуби со 36:37 од суперлигашот Радовиш. За радовишани ова е прекин на долгата серија порази.
Убедлива победа запиша и Мулти Есенс, кој со 46:24 беше подобар од Вардар Неготино. Идентично доминантен настап имаше и Прилеп, кој со 40:24 го совлада прволигашот Партизан.
Суперлигашот Куманово без проблеми триумфираше против Шампион со 46:18, додека во прволигашката пресметка Македонија Ѓорче Петров славеше над Преспа со 38:26.
Најубедлив триумф вечерва оствари Еурофарм Пелистер 2, кој со 46:11 го декласираше Овче Поле и сигурно обезбеди место во следната рунда.
