Младиот фудбалер Игор Ристов потпиша тригодишен професионален договор со прволигашот АП Брера Струмица, а клубот денес го потврди договорот со 18-годишникот.
Од струмичкиот клуб истакнуваат дека како средина која отсекогаш промовира млади фудбалери произлезени од сопствената школа, посебна гордост претставува моментот кога тие ќе се наметнат и во сениорскиот тим. Ристов е дете на клубот, фудбалер кој своите први чекори во Брера ги направил токму во младинските категории, а сега добива целосен професионален третман.
Тој веќе е приклучен на тренинзите со сениорскиот состав, а паралелно ќе има право на настап уште една година и за младинската екипа.
Игор Ристов е роден на 7 ноември 2007 година и потекнува од радовишкото село Конче. Својата фудбалска кариера ја започна во Детонит Плачковица од Радовиш, каде настапуваше во периодот од септември 2018 до септември 2019 година, по што се пресели во Брера Струмица.
Ристов е и младински репрезентативец на Македонија. Во досегашната кариера беше дел од селекциите до 16, до 17 и до 18 години, а во моментов е член на репрезентацијата на Македонија до 19 години, што дополнително ја потврдува неговата перспектива и развоен потенцијал.
