Женскиот фудбалски клуб Билјанини Извори од Охрид ќе биде дел од престижниот 12. Меѓународен турнир „Пријателство за Девојки“ што ќе се одржи од 5 до 7 декември 2025 година во Пљевља, Црна Гора. Овој турнир е еден од најзначајните во регионот за млади и сениорски женски екипи, а охриѓанки во Црна Гора одат со високи амбиции.
Сениорската екипа, предводена од тренерот Александра Рубаноска, веќе неколку недели интензивно се подготвува за силната меѓународна конкуренција. Клубот е решен да ја претстави Македонија во најдобро светло и да се врати дома со пехар.
Овој настап е овозможен благодарение на континуираната поддршка и организацискиот ангажман на претседателот на клубот Јовче Попоски, кој обезбеди одлични услови за сите фудбалерки – комплетно бесплатно патување, сместување и исхрана. Попоски и годинава продолжува со традицијата да создава професионални услови, а фудбалерките веќе уживаа и на турнирите во Албанија и Србија.
Продолжува и одличната соработка меѓу ЖФК Брезница и ЖФК Билјанини Извори, која се базира на заеднички цели за развој на женскиот фудбал во регионот и размена на добри практики.
Билјанини Извори е клуб со богата историја – поранешен шампион на Македонија и учесник во квалификациите за Лига на шампиони. Екипата оди во Пљевља мотивирана, сплотена и со огромна желба да го потврди високото ниво на женскиот фудбал во Охрид.
Очекувањата се големи – а охридските девојки ќе имаат шанса да покажат дека со работа, организираност и вера, може да се стигне до европските височини.
Им посакуваме успешно претставување, спортска храброст и уште една прекрасна приказна за охридскиот женски фудбал!
