Екипата на Штип УГД го имаше своето европско деби во Челинџ Купот и беше поразена со 3-1 на гостински терен од Кол Ил во Осло, Норвешка. И покрај поразот, штипјани оставија одличен впечаток, покажувајќи дека имаат квалитет за да се надеваат на комплетен пресврт на реванш-средбата во Радовиш.
Првиот сет беше вистинска драма и заврши 35-33 во корист на Норвежаните – бројка што најдобро ја отсликува жестоката борба, пожртвуваноста и големата желба за победа на обете страни. Во вториот сет, Штип УГД возврати, одигра зрело и цврсто, славејќи со 22-25, со што го израмни резултатот и ја врати неизвесноста.
Третиот сет повторно им припадна на домаќините со 25-18, а во четвртиот сет штипјани беа блиску до ново израмнување, но Кол Ил успеа да слави во финишот со 25-23. Сепак, сите сетови кои Штип ги загуби беа минимално, што укажува дека разликата во квалитет не е голема и дека нашиот претставник има реални шанси за успех.
Реваншот ќе се одигра во СРЦ „25 Мај“ во Радовиш, каде што се очекува силна поддршка од публиката. Со ваква игра и со домашен терен на своја страна, Штип УГД може да ја оствари својата прва историска европска победа и да обезбеди пласман во следната фаза од Челинџ Купот.
