Утре во Валандово стартува новата сезона во Првата футсал лига, Проект ја брани двојната круна, а два поранешни шампиони сакаат да го соборат од тронот тимот од Јосифово, кој минатата сезона без ниту еден пораз, без ниту едно реми стигна до тронот во шампионатот и Купот на Македонија.
Шампионот одбраната на титулата ја стартува на домашен терен во салата „Филип Втори“ во Валандово, каде Проект ќе го пречека Јувентус Серава. Фаворитската улога е на страната на тимот на Игор Димов, а почетокот на мечот е во 19 часот.
Во сабота ќе се одигра еден натпревар, истиот се игра во Велес каде ќе се соочат Кеги Моби и Осогово од Крива Паланка, домаќинот има фаворитска предност.
За понеделник предвидени се два натпревари, кои ќе започнат во 20 часот. Во Куманово ќе се игра дербито на колото на два поранешни шампиони, кои ќе бидат најсериозни ривали на Проект, Форца ќе го пречека Шкупи.
Двата тима најавуваат „кандидатура“ за шампионскиот пехар, а соочувањето во првото коло ќе биде вистински тест за амбициите и квалитетот на двете екипи.
Во Скопје ќе се одигра дуелот меѓу Бутел и поранешниот шампион на Македонија, Железарец, кој по една сезона во Втора лига направи експресно враќање во елитата.
Колото се затвара со дуелот меѓу Клими и повратникот СЕЕ Универисити, дуел кој е закажан за вторник од 20:30 часот.
