Младост во претходното коло пропушти можност за прва сезонска радост против Мулти Есенс, откако ремизираше и во Богданци се врати во бод, фокусот веќе е на следниот предизвик пред домашната публика со Еурофарм Пелистер 2.
Душан Каркалашев за Спортска Мрежа најпрво истакна дека слаба реализација во клучните моменти, но и недоволно добрата транзиција била пресудна во Автокоманда.
Младиот ракометар на Младост надополни дека покажале борбеност и каракатер.
„Мислам дека пресудна беше слабата реализација во клучните моменти, а исто така и недоволно добрата транзиција во напад, односно полуконтрата. Повторно имавме натпревар во кој бевме многу блиску до позитивен резултат, но не успеавме да ги искористиме шансите што ги создадовме. Од друга страна покажавме борбеност и карактер и мислам дека со малку повеќе концентрација и подобра реализација можевме да стигнеме до победа.“
Каркалашев е дециден, нема притисок пред мечот со битолчани, а атмосферата во тимот е одлична.
„Нема притисок, бидејќи играме дома и атмосферата во тимот е одлична. Знаеме дека нè очекува тежок натпревар, но максимално сме мотивирани и веруваме дека можеме да стигнеме до првата победа и да ја израдуваме и публиката.“
Младост утре ќе атакува на прва сезонска победа, а полната сала и поддршката од публиката е многу важна за избраниците на охридскиот стратег Горан Андоновски.
„Поддршката од публиката многу ни значи. Полна сала и навивачи кои се со нас во текот на целиот натпревар ни даваат дополнителна енергија и мотив да го дадеме максимумот.“
Мечот меѓу Младост и Еурофарм Пелистер е закажан за сабота од 17 часот во салата „Млаз“ во Богданци.
