По пауза од шест години, во Македонија повторно е оформена група од 22 кандидати кои ќе го следат највисокото ниво на тренерска едукација – УЕФА ПРО лиценца.
Отворањето на семинарот го поздрави претседателот на ФФМ, Масар Омерагиќ, кој изрази голема поддршка од страна на федерацијата и потенцираше дека стекнувањето со УЕФА ПРО е клучно за подигање на критериумите и квалитетот на домашните лиги.
Настанот го збогатија бројни легенди на македонскиот фудбал, меѓу кои Горан Пандев, Илија Најдоски, Благоја Милевски, Агим Ибраими и Бобан Бабунски, кои со своето присуство дадоа дополнителна мотивација на кандидатите. Директорот на Центарот за едукација на тренери, Борче Христов, истакна дека учесниците ќе поминат низ осум модули со предавања, практични тренинзи и дискусии со врвни домашни и меѓународни експерти, во согласност со новата УЕФА конвенција 2025/2026.
Големиот интерес за курсот е показател за растот на тренерската професија во земјата. Меѓу кандидатите се наоѓаат многу поранешни и активни фудбалери, како Дарко Тасевски, Бобан Грнчаров, Влатко Гроздановски, Един Нурединоски, Марио Ѓуровски, Филип Ивановски и други. Посебно значаен момент е учеството на две жени-кандидати, што претставува првпат во рамките на УЕФА ПРО во Македонија. Нивниот образовен процес е поддржан и стипендиран од ФФМ и УЕФА, како дел од напорите за развој и афирмација на женскиот фудбал.
Програмата ќе обработува теми од лидерство и менаџмент, анализа на играта, психолошка подготовка на фудбалерите, комуникациски вештини и современи тренинг методи. Кандидатите ќе имаат можност да учат од врвни европски предавачи како Алберт Капељас, Гинес Мелендез и Курбан Гурбанов, како и од домашни експерти.
ФФМ им честита на сите кандидати и потврди дека ќе продолжи со вложувања во тренерската едукација и развојот на професионалниот фудбал во Македонија.
