Македонската најдобра тенисерка Лина Ѓорческа со победа го отвори настапот на ИТФ турнирот од серијата W75 што се игра во Букурешт. Во исцрпувачки меч кој траеше дури 170 минути, Ѓорческа ја совлада домашната тенисерка Георгиа Крачун со 2-1 во сетови (6-4, 4-6, 7-5). Турнирот се игра за награден фонд од 60.000 долари.
Ѓорческа одлично го започна дуелот и со сигурна игра во клучните поени успеа да го освои првиот сет со 6:4. Во вториот сет Крачун возврати со агресивна игра и по неколку решавачки гема го доби сетот со ист резултат 6:4, израмнувајќи на 1-1.
Третиот сет беше вистинска драма. Ѓорческа поведе со 3:0, но ривалката се врати и израмни на 3:3. Македонката повторно создаде предност од 5:3, Крачун пак израмни на 5:5, но во завршницата Ѓорческа ја покажа поголемата ментална стабилност и ги освои следните два гема за конечни 7:5 и заслужена победа.
Со овој триумф, Ѓорческа се пласира во второто коло каде ќе се сретне со Италијанката Ноеми Бастилети, која по голема борба со 2-1 во сетови ја совлада сонародничката Лаура Маир.
