В сабота од 18 часот салата „Млаз“ во Богданци повторно ќе се наполни до последното место за мечот меѓу Младост и Струга од 11. коло на Суперлигата.
Дуел на две екипи кои минатата сезона играа во баражот, Младост тогаш ја совлада Струга и обезбеди влез во елитата, а стружани по сплет на други околности односно откажаното учество на Пролет за натпреварување во Суперлигата ја спаси Струга и ја врати во елитата.
Еден од најискусните во редовите на Младост, Даниел Андоновски за Спортска Мрежа вели дека очекува „прав“ машки суперлигашки натпревар, каде што доколку го задржат нивото на одбранат од последниот меч со Охрид и со концентрација во нападот ќе напаѓаат за позитивен резултат.
„Во сабота на домашен терен ја пречекуваме екипата на Струга. Екипата која минатата сезона ни беше последната пречка до посакуваниот влез во Суперлигата. Оттогаш реконструирана со многу играчи кои имаат искуство во Бундеслигата и Лигата на шампионите, што само треба да ни биде мотив плус. Очекувам еден „прав“ машки суперлигашки натпревар со добри, цврсти одбрани на двете страни. Трибината која на секој натпревар е полна до последно столче треба да ни биде ветер во грб за да стигнеме до нашата прва сезонска победа. Да го задржиме нивото на одбрана од последниот натпревар во Охрид, каде што примивме 24 гола, и со концентрација во нападот, како и борба до последен здив за секоја топка, напаѓаме на позитивен резултат“, вели Даниел Андоновски за Спортска Мрежа.
Младост ја бара првата сезонска победа со која ќе направат „бегство“ од опасната зона и ќе прогресираат за неколку на табелата.