По години на неизвесност и „проштални“ натпревари на други терени, фудбалскиот клуб Тетекс конечно се враќа таму каде што отсекогаш припаѓал – на Градскиот стадион во Тетово.
Клубот преку официјалните канали потврди дека претстојниот натпревар против Слога Виница ќе се одигра во вистинскиот дом на „штофарите“. За љубителите на фудбалот во Тетово ова е повеќе од обична вест – тоа е враќање на една традиција, емоција и спортска историја.
Во изминатите години, Тетекс се соочуваше со бројни проблеми и несогласувања околу користењето на стадионот, особено со Шкендија и локалните власти, поради што беше принуден да игра на алтернативни терени. Сега, ситуацијата конечно изгледа решена, а клубот е подготвен да ја врати старата магија.
Очекувањата се големи. Од управата на клубот повикуваат сите тетовчани – млади и стари, вистински вљубеници во фудбалот – да го исполнат Градски и да создадат атмосфера каква што одамна недостасуваше.
„Ова е само почеток,“ порачуваат од клубот, најавувајќи дека враќањето дома е првиот чекор кон нови победи, нови успеси и подобра иднина за Тетекс.
Во недела, Тетово повторно ќе живее за фудбалот – а „Југ“ повторно ќе одекнува.
