Иако беа блиску до победа, ракометарите на Охрид примија гол во последната секунда и ремизираа- 24-24 во Автокоманда. Охриѓани водеа во првото полувреме, но домаќините направија пресврт во второто, водеа со четири гола, додека Охрид успеа да се врати и дури имаше и водство, но не успеа да го задржи.
Новото засилување на Охриѓани, искусниот шпански дефанзивец- Ориол Реј Моралес, во кратка изјава за Спортска Мрежа, истакна дека и двата тима имале добра одбрана во првиот дел, но во второто полувреме домаќините ги казниле со брзи контра напади, но сепак смета дека бодот е многу важен за нив:
,, Денешниот натпревар беше многу тесен. Во првото полувреме, нашата, а и нивната одбрана покажа многу карактер и интензитет. Во второто полувреме, тие нѐ казнија со многу брзи напади и некои акции коишто беше тешко да се одбранат, но сепак ние останавме фокусирани до крај и храбро освоивме еден голем и многу важен бод за нас. “- изјави Моралес.
Во таборот на Охрид, Ѓукиќ беше најдобар стрелец со пет гола на натпреварот, Иванковиќ даде четири, а голманот Блажески имаше десет одбрани. Кај домаќините, Борзаш и Тордарсон беа најефикасни со шест, односно пет гола.
Во следното коло, Охрид ќе игра дома против Струга, додека момците на Лазаров, гостуваат кај Тиквеш.
