Кожуф ја продолжи серијата одлични настапи во новата сезона, совладувајќи ја Каменица Саса на гостински терен со убедливи 1:3. Гевгелчани одиграа уште еден зрел и дисциплиниран натпревар, кој им ја донесе втората победа во првите три кола.
По натпреварот, тренерот на Кожуф, Иван Варадиновски, за „Спортска Мрежа“ ја истакна важноста на внимателниот пристап.
„Имаме одличен старт, но тоа не треба да нè залажува, бидејќи уште сме на самиот почеток. Лошо влеговме во натпреварот и лесно можеше домаќините да поведат. Сепак, брзо се консолидиравме и стигнавме до посакуваната цел. Целосно сум задоволен од тоа како изгледаме во овие три натпревари, а за тоа најмногу заслуга имаат играчите и нивната посветеност во секој сегмент на играта.“
Со оваа победа, Кожуф останува меѓу водечките екипи во Втората лига, додека Каменица Саса ќе мора да бара излез од кризата во следните кола, со оглед на слабите резултати и тешкиот распоред кој следува.
