Детонит Плачковица ја запиша својата прва домашна победа сезонава, совладувајќи ја Слога Виница со минимални 1:0 на Градскиот стадион во Радовиш. Херој на натпреварот беше Сашо Дуков, кој го постигна единствениот погодок на средбата.
Иако резултатот е минимален, натпреварот понуди динамична игра и неколку стопроцентни шанси за двата тима. По дуелот, тренерот на Детонит, Горан Здравков, за „Спортска Мрежа“ ги сподели своите впечатоци:
„Најважно за нас е дека победивме, најважни се трите бодови. Натпреварот беше тежок затоа што имавме искусен противник кој знае што сака. Во првото полувреме бевме подобри, постигнавме гол и имавме уште три-четири чисти шанси, дури погодивме и пречка. Во второто полувреме бевме повнимателни, чекавме шанса на контра и полуконтра и успеавме да се одбраниме. Најважно е што противникот не создаде ниту една вистинска шанса за гол.“
Здравков се осврна и на почетокот на сезоната, потенцирајќи дека тимот мора да биде задоволен со освоените бодови:
„Мораме да бидеме задоволни со шесте бода кои ги имаме во моментов. Натпреварот во Јегуновце беше разочарувачки поради судиските одлуки, но тоа е минато. Сега фокусот е кон следниот дуел со Беласица, која е еден од главните претенденти за влез во Првата лига. Доколку се игра во вечерни часови, тоа ќе биде мотив плус за нас, бидејќи ќе биде посвежо и ќе имаме доволно време да се подготвиме.“
Со оваа победа, Детонит Плачковица најавува амбициозна сезона и потврдува дека ќе биде сериозен конкурент за висок пласман во Втората лига.
