Помладите пионери на ФК Македонија Ѓорче Петров се новите победници на Купот на Македонија, откако денеска на теренот на тренинг-центарот „Петар Милошевски“ во Скопје, извојуваа заслужена победа над Работнички со 3:1, во финален натпревар исполнет со многу возбудувања.
Лавовите поведоа во 21. минута преку Стефан Ристиќ, кој со прецизен удар ја отвори серијата голови. Само пет минути подоцна, Ристиќ повторно ја затресе мрежата и со вториот погодок донесе значајна предност од 2:0 за Македонија Ѓ.П.
Работнички не се предаде и до крајот на првото полувреме успеа да намали на 2:1. Алек Трпковски беше прецизен во 43. минута и му даде надеж на својот тим за враќање во мечот.
Во второто полувреме и двете екипи имаа свои шанси, но конечната одлука падна во 77. минута, кога Лука Кнежевиќ го постигна третиот погодок за Македонија Ѓ.П. и ја потврди победата и освојувањето на трофејот.
Со оваа победа, младите фудбалери од Ѓорче Петров ја потврдија својата доминација и напредок во младинските категории, а триумфот во Купот е голема награда за нивната работа и посветеност.
Виолета Јанчева, Спортска Мрежа
