Како што дознава Спортска Мрежа второлигашот Вардарски од Богданци за пролетната полусезона се засили со неколку нови играчи, со кои тимот ќе се обиде да избори опстанок, со оглед на тоа што во Втора лига се врати после долги 27 години.
Според нашите информации нови играчи во тимот на Вардарски се голманот Филип Лазаревски кој доаѓа од редовите на Слога Виница, а во својата кариера 27-годишникот беше дел и од Кадино, Воска Спорт, Скопје, Работнички, Шкупи, Тетекс, Кораби, Илинден, Борец, Еуромилк, Беласица и Металург од каде и ја започна кариерата.
Ново име во Богданци е и Лука Јакимовски, иако истиот играч беше промовиран во Борец од Велес пред неколку години, сепак се случи промени овие денови и тој е нов играч на Вардарски. 18-годишникот беше дел од Осогово, каде настапуваше во есенскиот дел, а тој е дете на Вардар. Нов играч е и Стефан Спировски кој доаѓа од редовите на Пелистер.
Како што дознаваме ново име во Вардарски е и Ахмед Домазет, 20-годишен фудбалер кој доаѓа од Охрид, а кој беше дел од Караорман и младинските категории на Струга Трим Лум.
Во тимот на Вардарски нов играч е и Мирон Илиевски, кој пак пристигна од Борец. 25-годишникот беше дел и од Каменица Саса, Кадино, Њу Старс, Осогово и Силекс. Во својата кариера Илиески имаше своја авантура во Словенија настапувајќи за Свобода Љубљана, а имаше авантура и во Грција.
Вардарски е на дното од табелата со 5 бодови, колку што има и Борец, а тимот од Богданци во есенскиот дел имаше учинокот од една победа, две ремија и 12 порази. Клубот за пролетниот дел ќе води сериозна борба за опстанок, за таа цел се овие засилувања, а според нашите информации не е исклучена можноста за уште неколку засилувања, тимот сака опстанок, Богданци е мало гратче каде што многу се сака спортот, така е и со ракометот, а со оглед на тоа што жителите на Богданци и сите кои се љубители на фудбалот и симпатизери, навивачи на клубот чекаа 27 години за Втора лига, дефинитивно борбата ќе биде голема за Вардарски и следната сезона да биде дел од Втората лига.
Шанси реални за опстанок има! Со квалитетни подготовки, физички и тактички подготовки, клубот има реални шанси да дојде и до директен опстанок или пак бараж. Со оглед на тоа што повеќе екипи се разнишани од долниот дел на табелата, сите се со еднакви шанси за опстанок, а тоа ќе понуди неверојатно интересна и неизвесна пролет.
Пролетниот дел тимот на Вардарски го отвара Скопје на Градскиот стадион во Богданци.
