Апсолутниот фаворит во групата Б и актуелен бранител на титулата на ЕвроВолеј 2026, Полска, е следниот противник на македонската одбојкарска репрезентација. Дуелот од третото коло на групната фаза се игра попладнево од 18 часот по македонско време во арената „8888“ во Софија.
Македонија и Полска по вторпат ќе се сретнат во групната фаза на Европското првенство, откако претходно играа и во Скопје во 2023 година.
Полјаците досега имаат две максимални победи, над Португалија и Израел, додека Македонија претрпе порази од другите два фаворити во групата Б – Бугарија и Украина.
За нашата репрезентација ова ќе биде трет настап на Европско првенство против актуелен европски шампион. Претходните два дуели завршија со порази од 3:0 – против Русија во 2019 година во Љубљана и против Италија во 2023 година во Бари.
Интересно е што Македонија и Полска имаат израмнет меѓусебен скор од по две победи. Полјаците до двете победи стигнаа во квалификациите за ЕвроВолеј 2014, кога славеа двапати со 3:0. Македонија, пак, двапати ја совлада Полска во Европската лига во 2015 година – со 3:2 и 3:1.
Сепак, Полска е голем фаворит во денешниот дуел, пред сè поради својот квалитет, ранг и составот со кој располага. Импресивна е и нивната серија на Европските првенства – имаат 12 последователни победи, која трае уште од полуфиналето на ЕП 2021.
За Македонија, овој натпревар ќе биде можност за ново искуство и последна силна проверка пред клучните дуели со Израел и Португалија, против кои нашата селекција ќе ја бара шансата за позитивен резултат на ЕвроВолеј 2026.
