Ракометарите на Бутел Скопје ја прекинаа серијата без победа во домашниот шампионат и стигнаа до првите бодови во Супер лигата. Избраниците на Стојанче Стоилов славеа на гостински терен против Мулти Есенс со 29-31, во рамките на деветтото коло.
Гостите го контролираа резултатот во поголемиот дел од првото полувреме, па на одморот заминаа со предност од два погодоци (15-17). Сепак, продолжението донесе поинаква слика на теренот. Мулти Есенс ја презеде иницијативата и во 45. минута имаше солидна предност од три гола (24-21).
Бутел не дозволи домашниот состав да се одлепи резултатски, па постепено ја топеше негативата и во 55. минута стигна до израмнување (27-27). Во финишот се водеше изедначена битка, но скопскиот тим покажа поголема концентрација во клучните моменти. Со два врзани погодоци поведе со 28-30, а потоа ја задржа предноста за конечни 29-31.
Дамјан Субашевски беше најефикасен во победничкиот состав со осум реализации, додека Лука Јовиќ придонесе со седум гола. Кај Мулти Есенс, Јован Петрески исто така осум пати ја затресе противничката мрежа.
Со овој триумф Бутел Скопје конечно го запиша првото славје во првенството, а за Стојанче Стоилов тоа е прва суперлигашка победа на клупата на тимот. Мулти Есенс, пак, и по девет одиграни кола останува без освоен триумф.
